കൊച്ചി: രമേശ് വർമ്മ സംവിധാനം ചെയ്ത ‘കൂട്ടുവേഷങ്ങൾ’ ഇപ്രാവശ്യത്തെ മികച്ച സംഗീത ഹ്രസ്വചിത്രത്തിനുള്ള മ്യൂണിക്ക് പുരസ്കാരം നേടി. വിദേശത്തു നിന്നുൾപ്പടെ എത്തിയ അനേകം ഹ്രസ്വചിത്രങ്ങളെ പിന്തള്ളിയാണ് ഈ നേട്ടം. പി കെ മുരളികൃഷ്ണൻ രചനയും സജിത്ത് പള്ളിപ്പുറം സംഗീതവും നൽകിയ ‘രാവിനെ പ്രിയതരമാക്കിയ…’ എന്ന പദത്തിൻറെ ദൃശ്യാവിഷ്കാരമാണ് ‘കൂട്ടുവേഷങ്ങൾ’.
സുനിലാൽ ചേർത്തലയാണ് പശ്ചാത്തല സംഗീതം നിർവഹിച്ചത് ഉണ്ണികൃഷ്ണൻ യവനികയാണ് ക്രിയേറ്റീവ് പ്രൊഡ്യൂസർ. ഫാക്ട് പത്മനാഭനും കോട്ടക്കൽ നന്ദകുമാരനും പ്രധാന വേഷങ്ങളിലെത്തുന്നു. ഏഴുമിനിറ്റാണ് കൂട്ടുവേഷങ്ങളുടെ ദൈർഘ്യം.
രമേശ് വർമ്മ കാലടി ശ്രീ ശങ്കരാചാര്യ സർവകലാശാലയിലെ നാടക വിഭാഗത്തിൽ അധ്യാപകനും നാടക-കഥകളി കലാകാരനുമാണ്. ബിഗ്ബി, ഉസ്താദ് ഹോട്ടൽ തുടങ്ങിയ ചിത്രങ്ങളിലൂടെ ചലച്ചിത്ര ലോകത്തും ശ്രദ്ധേയനാണ്.
